معيايدة من عمكم طاهر

بسم الله الرحمن الرحيم

 عيدكم امبارك وأيامكم سعيد وكل عام وانتم ابخير, معايده انوديها لكل اولادنا واخوانا واخواتنا وكل العراقيين فرداً فرداً زغير وجبير ونتمنالكم أيام سعيد والله يرزق الحج الكل واحد ماحاج , ونتمنه العوده لكل واحد حاج كبل ,

 هذا العيد اتعرفونه شنهو من عيد : هذا عيد الحجاج وآنا رحت للحج كبل وشفت كلشي اهناك أوّل شي شفته من وصلنا لمسجد الشجرة كالونه طبوا واسبحو بالحمامات سبح الاحرام ومن اتخلص اتكول لبيك اللهم لبيك لبيك لا شريك لك لبيك إنَّ الحمد والنعمة لك لبيك لا شريك لك وهذي الكلمات انرددها ماطولنا ماشين إلى مكه , آنا سألت الشيخ الجان ويانه كتله شنهي معنى هذي الحجايات وليش إحنه ذبينه اهدومنه كلها ولبسنه هذي الملابس البيض كالي اكعد خل اكلك , لمن كعدت كال شوف إنت من طبيت وسبحت هذا السبح ايزيح كل الذنوب الجانت عليك , وتلبس هذي الثياب المابيها اذنوب واذب ثيابك الاوليه الجانت عليك المتروسه اذنوب , ومن اتكول التلبيه , لبيك اللهم لبيك , يعني اتكل الربك لبيك ربي  عبدك بين اديك اشتامرني , أنا اطيك ياربي كل شي حتى ركبتي جدامك مثل ما كال النبي  اسماعيل بن ابراهيم عليهم السلام لمن راد ايذبحه أبوه طاوع وما عاند ابوه والله من شافه صادق فداه , بالكبش يعني الطلي , لكن الحسين أبا عبد الله لمن احرم واحل احرامه يوم الترويه وراح للعراق لكربله وصارت حرب يزيد الله ايلعه اهنا الحسين نفسه انذبح وانكصت ركبته وكصاها الشمر الملعون , ليش والحسين كلش صادق لكن الله ابكيفه ايريد يفديه لو ما يفديه , لازم واحد يحجي الصدك ولا يجذب لمن ايكول لبيك يعني صدك لبيك , مو ايكول الربه لبيك وهو ما ايطاوع جذاب , عمي خافوا الله ترى الله ايشوفكم شسوون وحتى البكلوبكم يدري بيه , اليريد يلعب بالدنيا ويجذب خله ابراحته ولازم يوم من الايام نوصل للموت ونموت ونندفن بالكبر وبعدين الله يسألنه عن الجبيره والزغيره وديروا بالكم ترى إذا واحد غافل الله مو غافل عنه , اليصير مسؤول خله ايدير باله على الناس الفقره ترى الله ايراقبه , وحتى العامل اليشتغل خله يشتغل زين وينصح ابشغله لا ايروح منا ويرد منا ويسخت , ونتمناكم حيات سعيده والله اعيده على أمَّة محمد بالخير والبركة