نلكاكم باجر وي عمكم طاهر 3 / طاهر-الناصرية
بسم الله الرحمن الرحيم
تنظفوا فإنَّ الإسلام نضيف :
هذا الحجي كاله النبي محمد صلى الله عليه وآله وسلم من كبل 1400 سنه , ونبينه هو رحيم كلش رحيم علينه وعلى كل الناس بس احنه مع الأسف ما ننتبه للحجي الزين ...!
هذا الحجي كاله النبي محمد صلى الله عليه وآله وسلم من كبل 1400 سنه , ونبينه هو رحيم كلش رحيم علينه وعلى كل الناس بس احنه مع الأسف ما ننتبه للحجي الزين ...!
يوم من الايام آنا رحت إلبيت اخوي بالسكان الصناعي هذا الحي إلّي علي درب سوك الشيوخ , لمن وصلت هناك اتعجبت لكيت حي يختلف عن كل الاحياء بالناصريه , الاحياء كلها مزدحمه بالبنيان إلّا هذا الحي واسع وبيه ساحات جبيره ومسطحه حلوه كلش , لكن دوخ راسي شي بيه : الزبايل والكواغد واجياس النايلون اتشوفه وين ما جان , كلت : شملها الناس هنا شايلين ماكو ناس عجيب .....!
وشفت بعد : تطلع النسوان وتذب الزبايل بالساحات وهاي الزبايل بيها خبز واعظام وخضرة ووساخه , وهاي بس ترميها النسوان تجي الصخول والطليان تبحث بالزباله وتشكك الجيوسه واطلع الخبز والخضره وتاكلها , وبعدين تجي الجلاب على العظام الباقيه واصيرلك عنصره على الزباله , شو انتم كل يوم تشتكون واتكولون اذتنه الجلاب وانتم اتذبولها اعظام جا اشلون ما تجي ؟ , انتم السبب مو الجلاب , هاي الساحات المفروض يكون بيها زرع وشجر ونخل مو زبايل ؟ هاي نقطه
ونقطه ثانيه : آنا رحت للرضا عليه السلام أبو محمد والنعم أبو طلبه وزرت وادعيتلكم , وشفت الصحن اشكبره وكلش نضيف وحلو , وبعدين هم زرت السيده معصومه ودعيتلكم بقم , من الشي الشفته : شفت الناس اهناك ما ايذبون الزبايل بالشارع , شفتهم ايخلونها بالبيوت وتجيهم سيارة الزباله كل اسبوع مره وتمر على البيوت بيت بيت , واهل البيوت ايطلعون الزبايل ويحطونها بالسياره كبل واتروح السياره بعيد عن الولايه وترمي الزبايل , هاي الحاله لو احنه انسويها بالناصريه جا كلَّت الجلاب ومحد يشتكي منها , وبعدين ذوله اهل الصخول ياخي المدينه ما ايصير بيها اصخول ولا طليان , وحتى مره ثانيه شفت وانا رايح إلى مدينه البكر سابقاً , وهسه يسموها مدينه الصدر رحمة الله على سيد محمد باقر الصدر ذاك العالم الجليل الكتله الجلب صدام الله يلعنه ويلعن اتباعه شفت أكو حديقه بنص الشارع مشتول بيها نخل وزرع وورد وهذا كلش حلو , بس آنه شفت بعيني محد كالي مكرم السامع مطي بنص الحديقه وبالش ياكل ومحد ايطرده , جا هاي اشلون راح تصير الحديقه حلو ؟؟؟؟؟؟؟؟؟؟ ماادري انتم ابكيفكم ههههههههههههههه
اكول : لازم الناس عليهم نص ونص على الحكومه , النص الاول الي على الحكومه اتخلي سيارة البلديه اتمر على البيوت بيت بيت وتاخذ الزبايل وما تسمح لكل واحد يذب الزباله بالشارع , وماتسمح للرعيان يطلعون اصخولهم وطليانهم بالولايه , والمطايه بعد ما بيها فيايده ليش : لأن أكو موجوده ستوتات وسيارات بعد اضن ماكو حاجة لعربانة المطي حتى لا ياكل الحيدقه الحلوه , ونلكاكم باجر وي عمكم طاهر