احبكم يا عراقيين/جليل عبد غاطي
دفتر طين
-
احبكم يا عراقيين
ما تقبل القسمة وما تصير اثنين
نقشها بخاتم ابراهيم
ومكتوبه اعْلَه دفتر طين
احبكم لا لاجل مذهب
احبكم مو اصلها الدين
احبكم خْضّرَتْ وَيَّاي
من هل الكاع من هل الطين
عمرها سنين آلآف او وراها سنين
احبكم ما يهمه اللون
احبكم ما يهمه الدين
احبكم تعرف الانسان
نسختها الوراثة وامنتّها الجِينْ
احبكم مو نهر ينسد
احبكم غيمة تمطر ما تشوف بعين
احبكم مو ضوه وينرد
احبكم شمس تنطي وما تعرف الدَين
احبكم عشك وردة تزيّنَت باللون
وتفوح بعطرها وتحْط عين بعين
احبكم عشك بلبل للغصن والناي
يصدح بالغزل ما يخشى نظرة عين
احبكم عشك عذري
بكل حرف تنكال
وبكل صوت تتغنى نشيد وتقبل التلحين
احبكم يا عراقيين
ارددها بفخر وانشرها بالتارخ
واورثها لحفيدي بتربية وتلقين
ابن يتباهى باهله ابين كل الناس
تِلوك الكُم -- احبكم – ياعراقيين
جليل عبد غاطي